MAIO 2020
Recomendamos: Dez gatiñas viaxeiras de Eva Mejuto
As dez gatiñas viaxeiras, da autoría de Eva Mejuto (texto) e Víctor Rivas (ilustración), é un álbum ilustrado para as primeiras lecturas, pero non só. Nada máis abrir a primeira páxina descubrimos que tanto o texto como as ilustracións buscan un público que goce da lectura visual sen importar a idade. A quen lle gusten os contos, a canción tradicional, as gatas, viaxar e, sobre todo, rir vai encontrar neste volume a historia adecuada. Esa que nos narra as aventuras e desventuras de dez gatiñas inquedas e algo rebuldeiras, pero, ás veces, tamén un chisquiño desastrosas. Unha historia universal, con base na tradición oral, que nos achega ás nosas propias emocións con factores diversos e espazos moi próximos.
As gatiñas van desaparecendo en circunstancias moi cómicas e ofrécenos estratexias necesarias para enfrontar situacións complexas. O humor é a ferramenta precisa para intrigarnos e querer pasar as páxinas para continuar a viaxe a canda as gatiñas revoltosas. Ademais, as ilustracións agasállannos unha lectura visual con mil universos por descubrir en cada páxina.
É moi recomendable non só o conto en si mesmo, senón tamén os mundos referenciais que constrúen, no seu conxunto, unha narración coa que riremos sen final e que nos presenta perspectivas interesantes para a rapazada. Acompañemos as gatiñas viaxeiras nas súas andanzas porque xa están á nosa espera para contalas e/ou cantalas!
Eli
Ríos
______________________________
GÁLIX aporta cada mes unha recensión feita por algún socio para a sección Este libro encantoumeda OEPLI, ao igual que o resto de seccións. Todos os meses poderás ver as recomendacións das secciónsaquí, na web da OEPLI e as de GÁLIX, ademais, no noso blog(bota un ollo na barra lateral!). Se queres colaborar coas túas recensións para esta sección, non dubides en nos contactar.
