ABRIL, 2019
Recomendamos Avións de papel de Xavier Estévez
Avións de papel é, en esencia, un libro que fala da amizade. Da amizade, de arte, de poesía, de rebeldía, de descubrirse a un mesmo, de soidade, de libros... e de avións de papel. Pois son estes inocentes xoguetes os que mudaran a vida de dous rapaces. Un neno e unha nena que viven illados por cadanseu motivo poderoso, e que se unen grazas ao azaroso voo destas improvisadas aeronaves. Unha unión que pronto atopará os puntos en común, en concreto a aparición dunhas misteriosas, poéticas e subversivas pintadas dun artista do graffiti, que nos lembra a Bansky. Un artista que poñerá en xaque ao concello no que viven e que traerá controversia á cidade entre os que aman as súas pinturas e os seus detractores.
Unha narración con ritmo variable como as ondas do mar, ás veces rápido e intrigante, como cando
investigan ao autor das marabillosas pintadas e outro máis lento, reflexivo, poético, como nos momentos nos que os nenos describen os seus pensamentos ou ideas sobre o que ven.
Un libro que xira entorno á arte non podería entenderse sen as marabillosas ilustracións de Marcos Viso, cuxo estilo sorprende pola (aparente) sinxeleza e que combina á perfección cunha estrutura en cadriños que nos lembra á banda deseñada. Un acerto!
Pode a arte cambiar unha vida? E a unha vila?
Anxo Fariña
